جتوئي، مصطفيٰ حيدر: سندس پورو نالو مصطفيٰ حيدر بخش جتوئي آهي. سندس جنم 26- مئي 1935ع تي تعلقي ڊگهڙي ضلعي ميرپورخاص ۾ ٿيو. جتي سندس والد حيدر بخش جتوئي تڏهن مختيارڪار هو. تعليم حيدرآباد ۾ مڪمل ڪيائين. ننڍپڻ ۾ ئي پنهنجي والد، هارين جي رهنما حيدر بخش جتوئيءَ جي صحبت ۾ ادب، شعر شاعري ۽ قومي خدمت ڏانهن لاڙو پيدا ٿيس ۽ اڳتي هلي صحافت جو پيشو اختيار ڪيائين. جتوئي صاحب جي صحبت ۽ پرورش، سندس دل ۾ وطني ۽ قومي درد پيدا ڪيو ۽ نتيجي طور منجهس ننڍي هوندي کان ئي حوصلي، مردانگي، جرئت، بيباڪي، اخلاق، راست گوئي ۽ قربانيءَ جا جوهر پيدا ٿيا.
صحافت ۾ چڱو نالو ڪمايائين۽ ٿوري ئي عرصي ۾ ملڪ جي ممتاز ۽ نامور صحافين جي صف ۾ جڳهه پيدا ڪيائين. مصطفيٰ حيدر، پهرين روزاني ’عبرت‘ حيدرآباد ۽ پوءِ روزاني ’انڊس ٽائيمس‘ (انگريزي) جو اسٽاف رپورٽر رهيو، ان دوران سنڌ جي مسئلن ۽ حقن لاءِ گهُٽ ۽ ٻوسٽ واري زماني ۾ جنهن بيباڪيءَ سان اقتدار جي صاحبن سان انٽرويوئن دوران سنڌ جي مسئلن تي بحث ڪندو هو، ان کيس هڪ منفرد ’ڇرڪائيندڙ‘ صحافيءَ جي حيثيت بخشي. ان زماني جي پريس ۾ سندس نمايان حيثيت رهي، جنهن جو اعتراف سندس همعصر سينيئر صحافي ڪن ٿا.
صحافت جاري رکندي، هي اي. پي. پي، يو. پي. پي ۽ پي. پي. آءِ خابرو ايجنسين جي نمائندگي ڪندو رهيو ۽ ساڳئي وقت اُن وقت جي مشهور انگريزي اخبار ’سول اينڊ ملٽري گزيٽ‘ (لاهور) ۽ ’ليڊر‘ (ڪراچي) جو به نمائندو رهيو. ننڍپڻ کان ئي کيس شاعريءَ جو شوق هو. پهرين ’آتش‘ تخلص اختيار ڪيائين، پوءِ والد جي چوڻ تي، ’مصطفيٰ‘ تخلص اختيار ڪري شاعري ڪيائين.
هن 1965ع ۾ سرڪاري ملازمت اختيار ڪئي. پبلڪ سروس ڪميشن جي امتحان ۾ ڪاميابي حاصل ڪري اول راولپنڊيءَ ۾ مرڪزي وزارت اطلاعات ۽ نشريات ۾ اسسٽنٽ انفرميشن آفيسر مقرر ٿيو، 1967ع ۾ ترقي ڏيئي کيس انفرميشن آفيسر بڻايو ويو. 1970ع ۾ ڪراچيءَ بدلي ٿي آيو، جتان 1973ع ۾ بلوچستان جي تڏهوڪي گورنر نواب محمد اڪبر بگٽيءَ پنهنجي صوبي بلوچستان لاءِ سندس خدمتون حاصل ڪيون ۽ هُو ڪوئيٽا ۾ ڊائريڪٽر پبلڪ رليشنس ۽ پروٽوڪول آفيسر جي عهدي تي فائز ٿيو.ڪوئيٽا ۾ ملازمت دوران هن نهايت تدبر، حوصلي، جفاڪشيءَ ۽ ذهانت سان پنهنجا منصبي فرض ادا ڪري پاڻ مڃايو.
1 مئي 1975ع ۾ سندس بدلي اسلام آباد ٿي. پر ان دوران بدقسمتيءَ سان کيس دل جو مرض ٿي پيو، جنهنڪري اسپتال داخل ٿيو. کيس ڪوئيٽا ۽ ڪراچيءَ ۾ علاج کان پوءِ حيدرآباد جي سول اسپتال ۾ آندو ويو. جتي ڊاڪٽرن جي خصوصي ڌيان جي باوجود ٺيڪ نه ٿي سگهيو ۽ 25- مئي 1975ع تي لاڏاڻو ڪري ويو .
1935.05.26 عيسوي
مصطفيٰ حيدر 26- مئي 1935ع تي تعلقي ڊگهڙي ضلعي ميرپورخاص ۾ ٿيو .
1975.05.25 عيسوي
مصطفيٰ حيدر 25- مئي 1975ع تي لاڏاڻو ڪري ويو .